22 ભાષાઓમાં તિરુક્કુરલ

தன் இல்லமெல்லாம் நிறையக்கூடிய பெரும்பொருளைச் சேர்த்து வைத்து அதனைத் துய்க்காதவன் அப்பொருளிடம் அவனுக்கு உரிமையேதும் இல்லாமையால் செத்தவனை ஒத்தவனாவான்.

பொருள் உண்டானால் அதனால் எல்லாம் உண்டாகும் என்று எண்ணி அதனைச் சேர்த்துப் பின்னர் யார்க்கும் ஈயாத மயக்கத்தால் ஒருவனுக்கு நிறைதலில்லாத பேய்ப்பிறப்பே உண்டாகும்.

அளவற்ற பொருளைச் சேர்த்தலையே விரும்பி, அதன் பயனான புகழை விரும்பாத மக்களது பிறப்பு நிலத்திற்குச் சுமையாகும் தன்மையதாம்.

ஒருபொருளும் யாருக்கும் கொடாமையால் யாராலும் விரும்பப்படாதவன், தான் இறந்தபின் இவ்வுலகில் இருப்பதாக எதனைக் கருதுவான்?

பிறர்க்குக் கொடுப்பதும், தாம் நுகர்வதுமாகிய இரண்டு செயல்களும் அற்றவர்க்குப் பலவாகிய அடுக்கிய கோடி செல்வம் இருப்பினும் ஒன்றும் இல்லாததுபோலாம்.

தானும் துய்க்காது, தக்கவர்க்கு ஒன்று ஈயும் இயல்பும் இல்லாதவன், செல்வத்திற்கு ஒரு நோயாவான்.

ஒருபொருளும் இல்லாதவர்க்கு ஒன்றும் கொடுக்காதவனது செல்வம் வீணாதல், மிக்க நலத்தினைப்பெற்ற பெண்ணொருத்தி கொடுப்பார் இல்லாமையால் கொழுநன் இல்லாமல் தமியளாய் மூத்ததற்கு ஒப்பாகும்.

வறியவர்க்கு அருகில் இருந்தும் ஒன்றும் ஈயாமையால் அவரால் விரும்பப்படாதவன் செல்வம், ஊர் நடுவில் இருக்கும் நச்சுமரம் பழுத்தாற்போன்றது.

சுற்றத்தார், நண்பர்மேல் அன்பு கொள்ளாது, அவர்க்கு ஏதும் ஈயாது, தானும் துய்க்காது வறியவர்க்கு ஈதல் எண்ணும் அறத்தை நினைப்பதும் செய்யாது சேர்த்துவைத்த ஒள்ளிய பொருளைப் பிறர் கைப்பற்றுவர்.

புகழ்பெற்ற செல்வத்தை உடையாரது சிறிதாகிய வறுமை, உலகைக் காக்கும் மேகம் வறுமையடைந்தாற்போன்ற தன்மையதாம். அவ்வறுமை சிறிது காலமிருந்து விரைவில் நீங்க, மீண்டும் அவர் ஈகையை மேற்கொள்வர்.