22 ॿोलियुनि में तिरुक्कुरल

நாணமாகிய தாழினைக் கோத்த நிறையென்னும் கதவைக் காமவேட்கையாகிய கணிச்சி முறித்தது.

எல்லாரும் செயலற்றிருக்கும் நள்ளிரவிலும் என் நெஞ்சத்தைத் தண்டித்துச் செயல்படச் செய்கின்றது. எனவே, காமம் என்று சொல்லப்பட்ட ஒன்று இரக்கமற்றது.

நான் காமத்தை என்னுள்ளே மறைக்க முயல்வேன்; ஆனால், இது குறிப்பறியாது, தும்மல்போல் அடங்காது வெளிப்படும்.

நான் என்னை நிறையுடையவள் என்று எண்ணியிருந்தேன்; ஆனால், என் காமம் இன்று மறைத்தலைத் தாண்டிப் பலரும் அறிய வெளிப்பட்டது.

தம்மைவிட்டு நீங்கிச்சென்ற காதலரின்பின் செல்லாமல், தாமும் அகன்றிருக்கும் நிறையுடைமை காமநோய்கொண்டார் அறியாத ஒன்றாகும்.

என்னைவிட்டு நீங்கிச்சென்றவர்பின் நான் செல்லவேண்டும் என்று வேண்டுவதால், நான் அடையும் துன்பம் எத்தன்மையது?

நம்மால் விரும்பப்பட்டவர் நம்மிடம் வந்து காமத்தால் நாம் விரும்பியவற்றைச் செய்தால், நாணம் என்னும் ஒன்றையும் நாம் அறியமாட்டோம்.

நம் நிறையாகிய அரணை அழிக்கும் படை பல பொய்களைச் சொல்லவல்ல கள்வனுடைய பணிவான சொற்கள் அல்லவா? அச்சொற்களால் நம் நிறை அழிந்தது.

காதலர் வந்தபோது புலத்தலைச் செய்ய எண்ணி முன்னில்லாது வேறிடம் சென்றேன். ஆனால், என் நெஞ்சம் நிறையில் நில்லாது அவரோடு கலத்தலைத் தொடங்குவதை அறிந்து அதனைக் கட்டுப்படுத்த இயலாது அவரை அணைத்துக்கொண்டேன்.

கொழுப்பைத் தீயிலிட்டால் அது உருகுவதுபோல் தம் காதலரைக் கண்டால் நிறையழிந்து உருகும் மனத்தை உடைய மகளிர்க்கு அவர் புணர நாம் ஊடியிருந்து, பின்பு ஊடலில் நிலைத்துநிற்போமென்று கருதுதல் இயலுமோ? இயலாது.