22 भासांनी तिरुक्कुरल

தன்னைவிட வலிமைமிக்க ஆந்தையைக் காக்கை, பகற்பொழுதிலேயே வெற்றிகொள்ளும்; பகைவரை வெல்லக் கருதும் வேந்தர்க்குக் காலம் இன்றியமையாதது.

காலத்தோடு பொருந்தச் செயல்படுதல், ஒருவரிடமும் நில்லாது நீங்கும் செல்வத்தைத் தன்னிடமிருந்து நீங்காமல் இறுகப் பிணைக்கும் கயிறாகும்.

ஒரு செயலை முடித்தற்கான கருவிகளுடன் செய்தற்கேற்ற காலம் அறிந்து செய்தால் ஒருவரால் செய்ய இயலாத வினைகளென்று சொல்லப்படுவன இல்லை.

ஒருவன் உலகம் முழுவதையும் தானே ஆளவேண்டுமென்று எண்ணினான் எனில், அதற்கான செயலைக் காலம் அறிந்து இடத்தோடு பொருந்தச் செய்வானாயின், உலகம் அவன் கையகத்ததாகும்.

தவறாமல் உலகமெல்லாம் வெல்லக்கருதும் அரசர், வலிமை மிக்கவராயினும் அது கருதாமல், ஏற்ற காலம் வரும்வரையிலும் காத்திருப்பர்.

வலிமைமிக்க மன்னன் பகைவர்மேல் படையெடுக்காது காத்திருத்தல், போரிடும் ஆடு ஆற்றலோடு பாய்வதற்காகப் பின்வாங்கும் தன்மையது.

அறிவுடையார், அவருடைய பகைவர் கட்டின்றிச் செயல்பட்டார்களாயினும் அவர்கள் அறிய வெளிப்பட வெகுளமாட்டார். தாம் அவரை வெல்லுதற்குரிய காலம் வரும்வரையிலும் உள்ளத்துள்ளேயே தம் சினத்தை அடக்கிக்கொண்டு இருப்பர்.

பகைவர்க்கு இறுதிக்காலம் வரும்வரையிலும் அவரைக் கண்டால் அரசர் பணிதல் வேண்டும்; அக்காலம் வரும்போது அவர்கள் தலைகீழாக வீழ்வர்.

தம்மால் பெறுதற்கரிய காலம் வரும்போது, அது கழிவதற்கு முன்பே, தம்மால் செய்தற்கரிய செயலைச் செய்துமுடித்தல் வேண்டும்.

ஒரு செயலைச் செய்யும் காலம் வரும்வரையிலும் ஒருவன் கொக்கினைப் போல் காத்திருத்தல் வேண்டும். உரிய காலம் வந்தவுடன் கொக்கு மீனைக் குத்துவதுபோலத் தன் செயலைத் தப்பாமல் முடித்தல் வேண்டும்.