22 भासांनी तिरुक्कुरल

இல்லறத்திற்கு ஏற்ற நற்பண்பு, நற்செய்கைகள் உடையவளாகித் தன்னைக் கொண்ட கணவனின் வருவாய்க்குத்தக்க வாழ்வை நடத்துபவள் நல்ல வாழ்க்கைத் துணையாவாள்.

இல்லறத்திற்கேற்ற நற்பண்புகள், நற்செய்கைகள் ஒருவனுடைய மனைவியிடத்தில் இல்லையாயின், அவ்வாழ்க்கை செல்வத்தால் எவ்வளவு மாட்சிமை பொருந்தியதாயினும், அதனால் பயனேதும் இல்லை.

ஒருவனுடைய மனைவி மாண்புடையவளானால், அவனுக்கும் அவனது இல்லறத்திற்கும் இல்லாதது யாது?அவள் அத்தகையவளாக இல்லையேல், அவனுக்கும் அவனது இல்லறத்திற்கும் உள்ளது யாது?

இல்லாள் கற்பென்னும் கலங்கா நிலைமை உடையவளானால், ஒருவன் அடையும் பொருள்களுள் அத்தகையவளினும் மேம்பட்ட பொருள்கள் எவையுள்ளன?

தெய்வம் எதனையும் தொழாமல், கணவனைத் தொழுது துயிலெழுகின்ற மனைவி பெய்யென்று சொல்ல, மழை பெய்யும். கற்புடைய மனைவியின் விருப்பமறிந்து தெய்வமே அவளுக்கு ஏவல் செய்யும்.

இல்லற நெறியினின்றும் வழுவாமல் தன்னைக் காத்துக்கொண்டு, தன்னைக் கொண்ட கணவனின் நலம் பேணி, இருவர்மாட்டும் சிறப்பான புகழ் நீங்காமல் காத்து, இல்லறத்தைச் சோர்வின்றி நடத்துபவளே பெண்ணாவாள்.

பெண்களைக் கணவர் சிறையால் காக்கும் காவல் என்ன பயனைச் செய்யும்? அவர்கள் தம் நெஞ்சைக் கற்புநெறியில் நிறுத்துதலே தலைசிறந்த காவலாகும்.

மகளிர் தம்மைக்காத்துத் தம் கணவரையும் பேணுதல் பெறுவரானால் தேவர்கள் வாழும் உலகில் பெருஞ்சிறப்பினை அடைவர்.

புகழை விரும்பி வேண்டும் மனைவி இல்லாதவர்களுக்குத் தம்மை இகழ்ந்துரைக்கும் பகைவர்முன் அரிமாபோன்று நடக்கும் பெருமித நடை இல்லை.

மனையாளது மாட்சிமையானது ஒருவனுக்கு நன்மையென்று அறிந்தோர் சொல்லுவர்; நல்ல மக்களைப் பெறுதல் அவர்களுக்கு நல்ல அணிகலமாகும்.