22 भाषा मे तिरुक्कुरल

ஒருவனை அன்பு காரணமாக விரும்பாமல் பொருள் காரணமாக விரும்பும் மகளிரின் இனிய பேச்சு அவனுக்குப் பின்னால் துன்பத்தையே தரும்.

ஒருவனிடம் உள்ள செல்வத்தை அளந்தறிந்து அதனை அடையும் வரையிலும் தம் பண்புடைமை பற்றிப் பேசும் பண்பற்ற மகளிரது நடத்தையை ஆராய்ந்தறிந்து அவரைச் சேராது விடுதல் வேண்டும்.

பொருளையே விரும்பும் பொதுமகளிரது பொய்ம்மையுடைய தழுவல் பிணமெடுப்பார் இருட்டறையில் முன்னறியாத பிணத்தைத் தழுவுதலை ஒத்தது.

பொருளையே விரும்பும் மகளிரது இழிந்தார்க்கே உரிய நலத்தை, அருளொடுகூடிய பொருளை ஆராய்ந்து செய்யும் அறிவுடையார் தீண்டமாட்டார்.

இயற்கையாகப்பெற்ற மதிநலத்தோடு மாட்சிமைப்பட்ட கல்வியறிவும் உடையவர் பொருள் கொடுப்பார்க்கெல்லாம் பொதுவாகிய ஆசையை உடைய மகளிரது புல்லிய நலத்தைத் தீண்டமாட்டார்.

ஆடல், பாடல், அழகு ஆகியவற்றால் செருக்குற்றுத் தம் புல்லிய நலத்தைப் பொருள் கொடுப்பார் யாவர்க்கும் தரும் மகளிர் தோளை அறிவு ஒழுக்கங்களாலாகிய தம் புகழைப் பரப்புதற்குரிய உயர்ந்தோர் தீண்டமாட்டார்.

நெஞ்சினால் பிறவற்றில் ஆசைகொண்டு அவை காரணமாகப் பொருள் கொடுப்பாரை உடலால் புணரும் மகளிர் தோள்களை நிறையால் திருந்திய நெஞ்சம் அற்றவரே தீண்டுவர்.

உருவம், சொல், செயல்களால் வஞ்சிக்கும் மகளிரது தழுவலை அவ்வஞ்சனையை ஆராய்ந்தறியும் அறிவு அற்றவர்க்கு அணங்கு தீண்டுதல் என்று நூலோர் கூறுவர்.

உயர்ந்தோர் இழிந்தோர் என்ற வரைவு இல்லாமல் பொருள் கொடுப்பார் யாவரையும் தழுவும் மகளிரது மெல்லிய தோள்கள், அக்குற்றத்தை அறியும் திறனற்ற கீழ்மக்கள் அழுந்தும் நரகமாகும்.

கள்ளமனமுடைய பெண்களும், கள்ளும், சூதும் ஆகிய மூன்றும் திருமகளால் விலக்கப் பட்டவருடைய நட்பாகும்.