22 ਭਾਸ਼ਾਵਾਂ ਵਿੱਚ ਤਿਰੁੱਕੁਰਲ

சூதில் வென்றாலும், வெல்லும் ஆற்றல் பெற்றிருந்தாலும் அதனை விரும்புதல் ஆகாது. சூதில் வெல்லும் பொருள் இரையால் மறைக்கப்பட்ட தூண்டில் இரும்பினை இரையென்று எண்ணி மீன் விழுங்கினாற்போலும்.

ஒன்றை வென்றவுடன் இன்னும் வெல்வோம் என்ற ஆசையால் நூற்றை இழந்து வறியராகும் சூதாடுவார்க்குப் பொருளால் அறமும் இன்பமும் அடைந்து வாழும் நெறி ஒன்று உண்டாகுமோ? ஆகாது.

உருளும் சூதாடு கருவியால் வரும் பொருளை இடைவிடாது கூறி ஒருவன் தொடர்ந்து சூதாடுவானாயின், அவன் சேர்த்த பொருளும், பொருள் வருவாயும் அவனைவிட்டு நீங்கிப் பகைவரைச் சேரும்.

தன்னை விரும்பியவர்க்குத் துன்பங்கள் பலவற்றையும் தந்து உள்ள புகழையும் கெடுக்கும் சூதினைப்போல, வறுமையைத் தரவல்லது வேறொன்றும் இல்லை.

சூதாடு கருவியையும் ஆடும் களத்தினையும் ஆடற்கு வேண்டிய கைத்தொழிலினையும் மேற்கொண்டு அவற்றைக் கைவிடாதவர் தம்மிடமிருந்த செல்வத்தையெல்லாம் இழப்பவராவார்.

சூது என்று சொல்லப்படும் மூதேவியால் விழுங்கப்பட்டவர் வயிறார உண்ணமுடியாதவர் ஆவார்; பெருந்துன்பம் அடைவர்.

ஒருவனது காலம் சூதாடு களத்தில் கழியுமானால், அது தொன்றுதொட்டுவந்த அவன் செல்வத்தையும் நற்பண்புகளையும் அழிக்கும்.

சூதானது, சூதாடுவானின் பொருளை அழித்துப் பொய்யை மேற்கொள்ளச் செய்து, அருளைக் கெடுத்து, அவனைத் துன்பத்துள் ஆழ்த்தும்.

ஒருவன் சூதினைத் தனக்குத் தொழிலாக விரும்புவானானால், உடை, செல்வம், உணவு, புகழ், கல்வி ஆகிய ஐந்தும் அவனை அடையா.

சூதாடலால் பொருளை இழக்குந்தோறும் அதன்மேல் காதல்கொள்ளும் சூதனைப்போன்று, உடலால் துன்பங்களை அனுபவிக்குந்தோறும் அதன்மேல் காதலை உடையது உயிர்.