22 भासांनी तिरुक्कुरल

நீ அவரை விரைந்து சென்று தழுவாது, இச்செயலை மேற்கொண்டு புலப்பாயாக; அவ்வாறு புலந்தால் காதலர் அடையும் துன்பத்தை நாம் சிறிது காண்போம்.

புலவியானது கலவி இன்பம்செய்தற்குத் தேவையான அளவினை உடையதாதல், உப்பானது உண்ணுபவையை இன்சுவையுடையவாய் ஆக்குதற்குத் தேவையான அளவு உடையதாதல் போன்றது.

தம்மைப் புலந்தாரைப் புலவி நீக்கிக் கூடாது செல்லுதல், முன்பே துன்பமுற்று அழிந்தார்க்கு மேலும் மேலும் துன்பத்தைச் செய்தாற்போன்றது.

தம்மோடு ஊடியவரை ஊடல்நீக்கிக் கூடாதிருத்தல் முன் நீர் பெறாமல் வாடிய கொடியை அடியில் அறுத்தாற்போலும்.

நற்பண்புகளால் தகுதியுடையவராய் இருக்கும் ஆடவர்க்கு அழகாவது பூவையொத்த கண்களை உடைய மகளிரது நெஞ்சில் நிகழும் புலவி மிகுதியாகும்.

முதிர்ந்த கலாமாகிய துனியும் இளைய கலாமாகிய புலவியும் இல்லையானால் காமம் முதிர்ந்த பழமும் இளம்காயும்போன்றது.

புணர்ச்சி இனி வருமோ, வராதோ என்று கருதலால், இன்பத்திற்கு இன்றியமையாத ஊடலிலும் ஒரு துன்பம் உண்டு.

இவர் நம்மால் துன்புற்றார் என்று அத்துன்பத்தை அறியும் காதல் உடையாரைப் பெறாதபோது ஒருவர் நோதலால் என்ன பயன்?

உயிருக்குத் தேவையான நீரும் நிழலில் இருப்பின் இனிதாகும்; வெயிலில் இருப்பின் இனிதாகாது. கலவிக்கு இன்றியமையாத புலவியும் அன்புடையாரிடம் இனிதாகும்; அன்பிலாரிடம் இனிதாகாது.

தான் ஊடலில் மெலியவும், பிரிந்திருக்கவல்லவரோடு கூடுவோம் என்று என் நெஞ்சம் முயலுதற்குக் காரணம் அதன் அவாவேதவிர வேறில்லை.